易潔鑊真係安全嗎?小夫妻Overcooked易潔鑊安全終極整合

易潔鑊真係安全嗎?小夫妻Overcooked易潔鑊安全選購及使用整合

市面上見到既易潔鑊林林種種,要搵隻自己岩用既易潔鑊唔容易,最大原因係買鑊時充滿難以理解既名目,鑽石/珍珠/雲石/麥飯石/特福易潔/麒麟/網紋/蜂巢/碳融合/超強乜乜耐刮塗層,又咩PFOA free,PTFE free咁….睇完基本上都唔太知道講緊乜。

而易潔鑊係咪一定會甩塗層?甩左出黎既塗層又係咪會致癌?點樣用隻鑊先最好,係咪乜野菜式都可以用易潔鑊煮?易潔鑊花左仲應唔應該用?點樣可以確保易潔鑊安全?相信好多人買一隻易潔鑊前都未必對依類問題有確實答案,亦可能一路用錯左都唔知道。

為左依個切身既問題(易潔鑊係好多人最常用既鍋具啊),小夫妻Overcooked翻查左唔少資料,嘗試整理出依篇易潔鑊安全既文章,文章較長,但我地認為當中既信息係每個用緊易潔鑊既朋友都應該需要知道。

TLDR既精簡結論:我地會儘量避免再買最常見個款PTFE塗層易潔鑊(包括乜乜鑽石/雲石/麥飯石塗層),越搵越多資料顯示佢係超過260°C使用(家用爐唔難達到)就會釋放有害物質,而制作過程亦因用上化學物質PFAS,除左會係環境中不斷累積毒素,亦已經有最新既證據顯示佢對人體有害。我地會考慮轉用材質使用上較令人安心既陶瓷不沾鍋黎代替。

係文章中,我地會盡量將牽涉推論過程既資料來源都附上連結,亦歡迎各位有疑問/其他觀點既話可以同我地分享,一齊出一分力令大家可以更無後顧之憂咁下廚!

文章部份

最近更新

我地做完依個易潔鑊安全既詳細調查後,得出既結論係我地會棄用市面上一般PTFE塗層易潔鑊,然後自己搵隻陶瓷不沾鑊返黎做我地既daily wok。

經一番張羅同測試後,Lowenthal牛油果陶瓷不沾鍋就係被我地選中既鍋喇!用落左覺得依隻鍋好好用,較早時間已經係我地既網店上架。而由於廣受客人歡迎,依家仲擴充左產品選擇,有24cm平底鍋28cm炒鍋同埋牛油果鍋優惠組合,迎合更多下廚需要!

其後我地繼續探索,搵到韓國Monacook可拆式手柄鍋套裝,佢賣點更多,例如層層疊既設計方便儲藏、方正鍋形令佢煮到更多食物、手柄有保護手腕既逆向安裝功能、用得明火爐電磁爐入得蒸爐焗爐、鍋蓋部件可完全拆開方便清洗… 係我地見過最強大既家用鍋具組合!

易潔鑊安全選購及使用整合

PTFE易潔鑊

點解突然會想了解多d易潔鑊?話說我地一直都幾鍾意用易潔鑊,因為真係可以唔洗點用油(甚至唔洗點用腦)咁用,完全做到唔痴底既效果,非常方便。但我地用左以上隻易潔鑊一年左右,原先都係灰色既鑊身就變成啡黃色了。我地好奇佢係咪變左質,繼續用落去係咪安全,結果睇睇下資料,真係有d擔心,並令我地做出棄用既決定!我地今篇文章會詳細講解原因。

易潔鑊選擇困難症?

難揀係正常的,因為似乎多數廠商都唔太想直接透露鍋既物料。

大部份品牌都會為自己既易潔鍋塗層起個特別名,睇完產品介紹你都唔會知道究竟實際上個鍋係用上咩物料。

易潔鑊品牌咁樣做有兩個原因,一就係透過依類營銷手法,令產品睇上去特別d,從而提升銷量。我地覺得如果產品真係有特別既地方,咁做都係將產品價值如實同消費者溝通,無可厚非。

但正正第二個原因令我地困惑,就係市面上大部份見到既易潔鍋,基本上都係使用PTFE(聚四氟乙烯)塗層,其中一個商業名稱係較為人熟知既Teflon(特氟龍)塗層。由於PTFE引起左唔少有關健康既爭議,所以基本上廚具廠商都好少會用PTFE或者Teflon去宣傳自己既產品,反而就係highlight產品用左其他既物質,例如:

  • 雲石/礦物塗層-多數係PTFE混和礦石顆粒,可以令塗層更抗刮,但下面將會講到,PTFE鍋既問題主要唔係抗刮力,而係稍為高溫已經會變質,有幾硬既顆粒都無助解決依個問題
  • 鑽石/珍珠塗層-PTFE混和硬物顆粒(如金屬,但亦有牌子話用左真鑽石,依點我地都不能求證,但幾百蚊買個鑊係咪真係有鑽石我地就唔敢肯定), 不過注意,有個別牌子鑽石/雲石塗層係陶瓷黎,一般依d牌子會注明用左陶瓷塗層
  • 麥飯石-即係做到石頭pattern既PTFE鍋
  • 網紋/蜂巢塗層-銀色部份係凸出既不鏽鋼,而黑色部份就係PTFE,都係為左抗刮而咁設計,但由於唔係全面由PTFE幅蓋,不沾力反而下降左,其實要當佢係無塗層既鍋咁用,所以亦會成日會聽到用依類鍋會成日痴底

廠商一般都會避免談及塗層主要成份PTFE,我地見到依類型易潔鍋既產品介紹都會主力強調雲石/珍珠/網紋等既微少差異。睇完依篇文章你可能都會明白背後原因。

但既然廠商避免談及,購買時又點分辨佢係咪PTFE製造?我地經驗就係你見到佢有標榜「PFOA Free」既就大多數都係,至於PFOA係乜下面都將會介紹,亦會解釋點解唔應該見到「PFOA free」就認定個鍋定安全。至於唔係用PTFE製造既,一般都會直接講明自己無用到PTFE。不過都好難一概而論,因為好多時產品都只會話佢係「non-stick coating」,無講明物質,亦有見過有d case係明明個種係PTFE塗層,但商家依然話佢係「PTFE free」,其實係有d難分。

而常見既PTFE易潔鑊以外,都仲有一d不含PTFE既選擇:

  • 陶瓷鍋-我地暫時所搵到最無安全疑慮而又能夠代替傳統PTFE鍋既選擇。相比起PTFE,陶瓷既代學成份基本上就同沙一樣,而用起上黎又同PTFE鍋一樣可以有良好不沾性能,唔洗養鍋又可以入洗碗機。陶瓷鍋係近10幾年新興起既一種係真正意義上可以取代PTFE鍋既不沾鍋,依篇文章我地會分享更多。
  • 碳融鍋-近期係Kickstarter開始興起既產品,塗層其實係一種耐高溫既膠PEEK(聚醚醚酮),一般應用場景包括汽車接駁位封口位既膠,或電器入面既絕緣體,而用黎做鍋既塗層係較新近既事。現時無任何資料顯示PEEK做鍋既塗層有安全風險,但用膠黎做鍋,個人選擇都係不了,因為好多膠都係應用左好多年先被發現可以影響人體賀爾蒙運作,例如BPA(雙酚A)。

PTFE不沾易潔塗層係咩?佢又有咩問題?

PTFE係1938年由杜邦公司(DuPont)科學家發現,公司將佢叫命名為Teflon,並應用係非常廣泛既地方,例如防水衣物、人造關節、電線絕緣膠等等,而用係鍋具做成易潔塗層亦係主要應用。時至今日,已經唔止杜邦一間公司有生產PTFE,其他公司生產既易潔鑊塗層唔會叫做Teflon,但其實都係講緊同一種物質。

PTFE本身係惰性物質,即係唔易同任何物質有反應,亦係佢能夠成為不沾塗層既其中一原因,而佢無毒性,就算食左落肚都唔會中毒。所以基本上市面見到既PTFE鍋都會話自己健康無毒,字義上係真的。

不過實際情況就唔完全係咁。

遇熱變質

首先PTFE既安全溫度極限係260°C,再高溫就會變質並開始釋出有毒氣體(一般家用爐唔難去到依個溫度,尤其係空燒時),依d氣體可以令人體出現不同程度中毒,輕易出現類似感冒癥狀,重則對肺部造成破壞而佢對鳥類係致命氣體,所以唔少外國既寵物組織都唔建議主人使用PTFE鍋。

要安全使用PTFE鍋,建議唔好開中火以上同埋唔好空燒鍋,但大部份用家根本唔知道要咁做,亦唔了解背後有咁樣既安全風險!

PFAS: 不會被分解的幕後大魔王

當睇更多資料,就發現PTFE鍋有個更嚴重既問題,叫做PFAS(多氟烷基物質)。PFAS係響製作PTFE鍋時使用,好似膠水咁將塗層穩固黏合係鍋身之上,所有PTFE鍋基本上都會有PFAS殘留,而高溫燒鍋時亦會釋放更多PFAS。

PFAS有4700幾種,由於極難分解,佢地都被稱為「forever chemical」,而且可以長時間停留係人體同環境中。1938年PTFE被發現後,PFOA(其中一種PFAS)就被應用起上黎,但幾十年後先被發現可以影響人類賀爾蒙系統、影響胎兒生長、破壞免疫系統,同埋引起癌症,2015年先被美國完全禁止使用。

2019年有就部電影《Dark Waters》,講述杜邦公司用PFOA製造PTFE,令工廠附近既美國人同農場動物不正常死亡既事件,以及之後既官司鬥爭。

依家絕大部份PTFE鍋都會標榜自己係PFOA free,從而宣示自己產品環保、安全、無毒。PFOA被禁用,當然就唔會再有PFOA了!但要造PTFE塗層,一樣要用到PFAS,廠方就去搵幾千種PFAS中未被證實有害既黎做替代品,例如近年就多數係用GenX黎代替。係咪就會變得好環保、安全、無毒?其實GenX都係PFAS黎,根本係性質類似既野,只係被塗層製造商選用既時候未被證明有毒,直至2021年10月美國國家環境保護局(EPA)先發表報告,將GenX既每日容忍量定為3納克/公斤,仲低過PFOA既20納克/公斤,亦即表示GenX甚至比PFOA更毒!所以我地都唔敢相信現時市面上既PTFE鍋都係安全無毒。

由於極難分解,PFAS會一直係環境累積,係美國甚至係普通自來水都會檢測到依種毒物,2021年10月,拜登政府宣佈立法規管PFAS。依種物質被人類製造出黎廣泛使用幾十年,到依家先有國家意識到問題嚴重性,開始作出規管。

由於PFAS有4700幾種,除左較「臭名遠播」既PFOA同PFOS由於有海量科學研究去證明佢有害,其餘既PFAS仍未受到同等注視,例如岩岩所講既GenX,化學性質類似,但就少好多科學研究報告。令我地覺得有趣既係,依個現象似乎導引左一d消費者機構,令佢地目光都注視左係PFOA同PFOS之上,見到市面上易潔鑊無驗出依兩種PFAS就同消費者報告易潔鑊可以安心使用(PFOA同PFOS係好多國家都被禁,檢測唔到當然係合理之事!)。

事實上,德國聯邦風險評估所(BfR,德國政府轄下專為保障消費者健康而設既獨立研究所)係2021年6月先發表過一篇報告,指佢地係一項研究入面發現部份德國人既PFAS攝取量已有偏高跡象,該報告特別針對接種疫苗後既抗體水平做研究,指出依個PFAS水平可以導致接種疫苗後既抗體下降,但亦推論可以令人體一般抵抗力減弱。而另一份係2021年11月發表既報告亦指出由於攝取極微量PFAS已達攝取上限,以現時既技術去檢測PFAS根本相當困難。至於例如致癌性等風險研究依家只集中係PFOA同PFOS,種種原因令BfR作出結論:建議推出措施減少市民從食物中攝取PFAS。

睇到依度,生活係PFAS未受規管既地方,我地選擇做既就係由自己做起,儘量唔再用PTFE鍋。

我地既易潔鑊推介:陶瓷不沾鍋

依部份分享下我地仲有用咩鍋,同埋依d鍋係咪取代到易潔鑊。

首先就係Vermicular既琺瑯鑄鐵平底鍋,都係好好用的,而且顏值爆表。

琺瑯塗層係用玻璃細粒燒製而成,化學成份同沙石一樣,但同陶瓷唔同既係不沾性能無咁高,有時唔用腦煮簡單野我地都會用易潔鑊,而且佢鍋身較淺,本身就唔係為成為一隻always pan而設計。

Skeppshult既鑄鐵鍋,非常厚身非常重,傳熱慢但儲熱力高,煮牛扒岩晒,不過好明顯佢只有特定用途。

陳枝記遠近馳名既熟鐵鑊,有左佢,用家用爐都煮得出少少鑊氣,整乾炒牛河特別好食。不過缺點都唔少,例如次次用完要用油養鍋,同埋用耐左會積落好多鑊屎,會整到d食物黑媽媽,家用爐又唔夠中餐廳既火水爐高溫,唔可以直接燒走鑊屎,所以都係難搞。

我地係韓國搜羅返黎既牛油果陶瓷不沾鍋。講不沾性能出色,易於打理,又無安全疑慮,暫時我地見到市面上既選擇基本上只有陶瓷不沾鍋。陶瓷不沾鍋係近10幾年先興起既鍋具,相比傳統易潔鑊,佢受認識既程度依然較低。

陶瓷塗層既原料係黏土/沙,被製成溶膏狀後,會被噴灑上鍋身,經高溫烘焗,形成堅固同滑溜不沾既塗層。由於佢化學組成成份係矽同氧,同沙、石、玻璃一樣,所以被認為係健康既選擇,而相比起PTFE鍋260°C就會受破壞而且釋放有毒氣體,陶瓷不沾鍋可以抵受450-500°C既高溫,而且就算去到高溫度,都只會損害不沾性能,唔會好似PTFE鍋咁釋放有毒既PFAS氣體。

陶瓷不沾鍋係咪完美既鍋?又唔係,因為陶瓷塗層相對黎講係無咁不沾,尤其係用得高溫多,不沾性能會慢慢下降,所以唔同廠商都係建議使用時避免長時間使用大火。但又咁講,即使PTFE鍋都係消耗品,因為無論PTFE定係陶瓷塗層,都會自然係煮食過程中被刮花,所以使用有塗層既鍋都應該配用矽膠鑊剷,用海綿或布清洗,同埋避免煮有骨既菜式,去減少損耗。

結語

我地知道依篇文章既立論同好多人既日常理解都唔同,所以依篇文章我地都儘量係闡述論點既時候加入適當資料來源,希望讓讀者了解到PTFE同PFAS同我地非常切身,而背後又潛藏點樣既健康同環境風險。

未去探索依個課題之前,我地係購買易潔鑊時都係好大程度上咁信任包裝上所寫既野,見佢到話無毒健康就信佢係,見到佢話自己係雲石易潔鍋就以為真係成個鍋都係雲石,覺得應該係天然素材所以好放心咁用,甚至使用時都唔知道佢係高溫時會釋放毒氣,成日都會猛火用佢。

我地更無想像過易潔塗層工業既歷史會有咁樣既一場歷史,PFOA被禁就用PFOS,都被禁就用GenX,而去到GenX都用左10幾年,美國官方就宣佈話GenX原來仲毒過PFOA,塗層廠商總可以係幾千種PFAS入面搵到未被證明有毒既替代品,成件事就好似玩緊文字遊戲咁。雖然美國剛剛宣佈會立法規管PFAS,但需時幾耐,會管得有幾嚴謹現時不能預知,更唔好講其他國家會幾時有同樣既管制。

我地既想法-邀請你既加入!

作為小小消費者,由於資訊不對稱,我地較難了解商品實際全貌,但由於一隻好用既又安全既不沾鍋對我地黎講係相當重要,所以小夫妻Overcooked係做完依篇資料搜集後,決定左要搵隻可以用得安心又好用既理想不沾鍋,自己用黎做日常鍋之餘,仲希望可以係我地網店發售,公諸同好。

而最新既更新係,我地經過左一番張羅,終於係韓國搵到隻陶瓷不沾鍋返黎,而且仲賣點多多!賣左一段時間,超受歡迎,依家已經增加左款式選擇,可以去我地既網店睇睇!

其後我地繼續探索,搵到韓國Monacook可拆式手柄鍋套裝,佢賣點更多,例如層層疊既設計方便儲藏、方正鍋形令佢煮到更多食物、手柄有保護手腕既逆向安裝功能、用得明火爐電磁爐入得蒸爐焗爐、鍋蓋部件可完全拆開方便清洗… 係我地見過最強大既家用鍋具組合!

對於我地既不沾鍋搜尋之旅有興趣?可以睇睇我地既分享:

理想易潔鑊不沾鍋搜尋之旅-3廠商5樣板開箱!

開箱+試用+介紹:Lowenthal牛油果陶瓷不沾鍋28cm Unbox and Trial Use Lowenthal Avocado Wok

牛油果鍋第2員 24cm平底鍋開箱 Unboxing Avocado 24cm Sauté Pan

完美鍋具套裝!開箱韓國可拆式手柄鍋Monacook陶瓷不沾鍋4件套裝 Unboxing Monacook Set of 4

_____________________________________________________

Facebook: 小夫妻Overcooked
IG: couple_overcooked
Pinterest: coupleovercooked
Contact Us

發佈留言

發佈留言必須填寫的電子郵件地址不會公開。 必填欄位標示為 *