兩人兩貓嘅煮食點滴，不專業分享各種香港人簡易菜色食譜。無論世界點變，香港點變，齊上齊落，毋忘初衷，吃好睡好，做個好人。
小夫妻 Overcooked
下廚係我地兩公婆好大嘅共同興趣，多年黎我地一齊煮一齊開心一齊成長。去到2020年，世界大停擺，人人都多左時間反思人生，我地發現一齊煮飯仔既時間係好珍貴好快樂嘅事情，我地想一齊係依件事上發掘更多，亦想將依份樂趣都分享俾更多人，所以就開始左小夫妻Overcooked依個project。
一開始我地都係響FB分享下廚經歷，做做下發現依樣野真係好有趣，所以無耐我地就開設埋依個網頁，更有系統咁分享食譜。係2021同2022年，我地作出左更多新嘗試，例如開設左自家網店，售賣我地覺得好用既廚具，一開始都係寄賣形式同品牌夾住做，做做下直程搵埋供應商入貨儲貨咁做，高峰時每月賣幾百件貨，要臨急臨忙搵part time幫手出貨，成件事對我地黎講都係好新奇既經歷。之後又試過同唔同品牌跨界合作，試用同分享佢地產品，又試過批發廚具俾其他公司，並用自家食譜同廚具crossover增加品牌熱度。
不過去到2022年尾，我地生活起左個大變化，就係我地既囡囡出世了，生活重心從此去左囡囡身上，加上疫後正職亦變得超級忙，黎到2023年，我地漸漸少左寫食譜(下廚機會都少左好多lol)，亦無暇兼顧網店經營了。雖然係咁，Couple Overcooked依個網頁仍然記錄左好多依幾年既生活點滴，我地都想繼續keep住依個網頁，並且係得閒時寫下新食譜。
我地期待繼續探索生命中好玩既事情！
我地嘅下廚之路
早在中學嘅階段，我地已經鍾意煮野食，除左上網搵食譜，仲會用下創意9煮唔同菜式(多數fail)。以下係一d起碼有10年歷史嘅小夫妻出品 (當時仲係小情侶)，有d菜式原來已經煮左好多年，例如麻婆豆腐同金菇肥牛卷，經過10幾年嘅演進，的確係唔同左好多。
不過一直到搬左出黎住，先真係比較密咁煮野食，而有左自己地方，可以買合心意嘅廚具，我地對煮出黎嘅出品就開始越黎越有追求，漸漸亦變得越黎越鍾意下廚，甚至有一期仲去左上堂學基本廚藝技巧。
以下嘅煮牛扒同埋雲吞雞我地都出左食譜了，可以比較下，都幾大分別 lol
2020疫情開始，大家都多左係屋企，我地更加係經常自己煮飯，就算要我地成個月都唔出街食飯都未驚過。就係依段時間，我地開始左記錄我地嘅煮食過程，然後係FB分享出黎，做下做下，直程整埋依個網頁，我地依家煮野食都成日翻睇依度嘅文章。
不經不覺間，我地嘅廚藝都進步左唔少，黎緊我地會繼續煮繼續寫，希望10年後再回望，我地會發現自己原來已經走左更遠嘅路。
我地嘅貓
我地係貓奴，領養左兩隻可愛嘅貓，男嘅叫梵高，因為佢身上嘅紋似《星夜》、有橙紅毛色、有隻耳仔被義工剪去一角，同埋佢成日叫，好煩膠。我地係響香港拯救貓狗協會領養佢返黎的。
女嘅叫墨硯(花名物演)，主要因為佢毛色似一幅水墨畫，而領養佢時嘴角有粒八婆癦，不過大大下粒癦變左一pat野。
梵高係隻好聰明嘅貓，識俾手手又識企起身，不過就好驚陌生人，次次有客到都會匿埋。而墨硯就掉返轉，乜都唔驚，係招呼朋友嘅歡樂小姐，但成日做埋d 6ou野。
我地嘅諗法
不時回望香港嘅滔滔巨浪，現時我地嘅生活簡直平靜得不可思議。但只要張開眼去望，見到每日社會嘅光怪陸離，我地都知道大風大雨從無停過。
風雨飄搖之中有人離開，而選擇留下黎嘅又應該點樣面對眼前東歪西倒？
我地俾自己嘅答案係做好自己，努力不遺忘，盡力擔當為傳承記憶嘅一份子。
世界由每一個人共同組成，我地改變，即係世界都有一點改變，聚集起足夠嘅點點改變，終有一刻會發生質變。保持耐心，令自己變得更好，有機會就將自己想法分享俾身邊嘅人，然後就憑依個信念，對未來有所盼望咁活下去。
我地鍾意煮野食，所以我地諗，或者可以寫下香港人嘅食譜，分享出黎俾更多人知道我地嘅煮食文化。共勉之。
如果天空是黑暗的，那就摸黑生存；
季業
如果發出聲音是危險的，那就保持沉默；
如果自覺無力發光的，那就蜷伏於牆角。
但不要習慣了黑暗就為黑暗辯護；
不要為自己的苟且而得意；
不要嘲諷那些比自己更勇敢熱情的人們。
我們可以卑微如塵土，不可扭曲如蛆蟲。